Libri me poezi që po merrni në duar, të dashur fëmijë, është shkruar nga Ersilja Çeli, nxënëse në klasën e katërt të shkollës nëntëvjeçare “Dora D’Istria” në Tiranë.

Kur të lexoni poezitë e saj, do të bindeni se “poetja” e vogël, moshatarja juaj,  ka shkëndijat e një talenti të lindur, që po e kultivon me dashurinë dhe sinqeritetin e një fëmije.

Në poezitë e këtij vëllimi poetik ju do të gjeni botën tuaj, ëndrrat tuaja, shpirtin dhe zemrën tuaj të pastër. Para jush do të shpalosen me një gjuhë të thjeshtë, me fjalë të zgjedhura e figura poetike të kuptueshme poezi për nënën e për babanë, për gjyshin e gjyshen, për motrën dhe shoqen e ngushtë, për shkollën e librin, por dhe për atdheun, për festën e flamurit, për nënë Terezën e kryeqytetin tonë Tiranën.

Ersilja na paraqet në këtë vëllim edhe dashurinë për natyrën, përmes vargjeve për pranverën e dimrin, borën e detin kaltërosh, për bletën punëtore e dallëndyshen shtegtare. Ajo na përcjell edhe dhimbje për plagët e kohës, si në poezitë “Det i thellë, det i zi”, “Lypsari”, apo “Nëna dhe djali”. Por gëzohet e na sjell gëzim me vjershat për festën e 1 Qershorit, të Vitit të Ri, të 7 e 8 Marsit etj.

Në këtë vëllim të thjeshtë ju, të dashur fëmijë, do të gjeni edhe disa poezi që luftojnë veset e këqija, apo nxjerrin në pah cilësitë e mira të “personazheve”. Të tilla poezi në formën e fabulave janë “Elefanti që shkon në qytet”, “Çobani”, ‘Lepurushi i zgjuar”, “Djali dhe lulet”, etj.

Ja, pra, pse theksuam në fillim që bota poetike e Ersiljes është dhe bota juaj, bota e fëmijëve të sotëm të Shqipërisë. Kjo shprehet më së  miri dhe në poezinë “Ëndrrat e fëmijëve”, nga e ka marrë edhe titullin ky vëllim poetik

I urojmë Ersilje Çelit udhë të mbarë në krijimtarinë poetike!

                                        Bardhyl Xhama

                                                   Mësues i merituar